Ein sameindur føroyskur fíggjargeiri – peningastovnarnir og Elektron – hevur í dag gjørt ætlanaravtalu (Letter of Intent) við stóra danska KT-veitaran Bankernes EDB Central, BEC. Undirskrivingin var fyrrapartin á Elektron í Havn.

Avtalan ber í sær, at partarnir nú fara undir eitt samstarv, ið m.a. hevur til endamáls, at BEC skal gerast KT-veitari hjá føroysku peningastovnunum.

Fyrimunir fyri peningastovnar og kundar

Greiðir fyrimunir eru við nýggja samstarvinum við BEC. Eitt nú gerst raksturin bíligari, eins og skipanirnar gerast betri og fevna breiðari enn í dag. Harumframt kunnu peningastovnarnir frameftir lætt og skjótt lúka lógarkrøv og sektorkrøv. Annar fyrimunur er, at peningastovnarnir nú fara í samstarv við allar limirnar hjá BEC, ið m.a. telja 71 aðrar peningastovnar. Tað kann skapa størri dynamikk og økt tænastuútboð á føroyska marknaðinum.

Stjórnirnar í føroysku peningastovnunum eru samdar um, at bæði peningastovnarnir og kundarnir fáa eina betri og effektivari tænastu, eftir at føroyski fíggjargeirin er farin yvir til BEC-skipanirnar. Harumframt verður frameftir lættari hjá føroyskum peningastovnum at fáa í lag samstarv ella virksemi í øðrum norðurlondum.

Gevur Elektron fótafesti uttanlands

Fyri Elektron og tey uml. 100 starvsfólkini merkir broytingin, at BEC gerst størsti kundin hjá Elektron. Frameftir skal Elektron ikki bert veita føroyskum brúkarum KT-tænastur men øllum limunum í BEC, har uml. 900 fólk eru í starvi.

- Hetta er ein tilgongd, ið kann menna Elektron serstakliga nógv og geva okkum fótafesti uttan fyri Føroyar. Vit síggja fram til at fara undir samstarvið við BEC, sigur Niels Christian Nolsøe, stjóri á Elektron.

Menning og ávirkan í BEC

Fyri BEC er tað ein heiður, at føroyski fíggjargeirin hevur kosið júst BEC sum KT-veitara til virksemið í Føroyum, Danmark og møguliga í øðrum londum.

- Hjá BEC hámeta vit tætta dagliga samstarvið, ið gerst úrslitið av, at føroysku peningastovnarnir hava valt at gerast limir hjá okkum og harvið eigarar í BEC. Limaskapurin tryggjar, at føroysku peningastovnarnir fáa ávirkan á framtíðar menningina í BEC, sigur Leo Svendsen, forstjóri í BEC.

- Elektron og BEC hava longu samstarvað væl í mong ár, og við nýggju avtaluni við Elektron kunnu báðir partar síggja fram til fleiri góðar felags upplivingar, sigur Leo Svendsen, ið gleðir seg til at fara undir samstarvið.    

Flytingin yvir til BEC-skipanirnar er ein sera stór KT-verkætlan í sær sjálvum og krevur nógv fólk við hollari vitan. Arbeiðið byrjar nú og tekur umleið eitt ár.

Viðmerkingar til upplýsingar í hesum tíðindaskrivi eru at fáa hjá:

Niels Christian Nolsøe, stjóra á Elektron, tel. 545112

Leo Svendsen, forstjóra í BEC, tel. 0045 61 56 25 48